Hong Kong-a nawrh huaihawtnaah buaina chhuak

Hong Kong-ah kar kal ta Inrinni khan mainland China aṭanga sumdawngte duh lohna lantirnaah buaina a chhuak a, police-te chuan nawrh huaihawtte hnawhdarh nan pepper spray leh tiangte an hmang. 

Hun eng emaw chen chu Hong Kong-ah hian nawrh huai­hawt a lo ni fo tawh a, Hong Kong sorkarin thiam loh a chantir tawhte mainland China-a thawn an nih theihna tur, extradition bill siam a tum chu duh loin, mipuiten lungawi lohna an lo lantir tawh ṭhin. Hong Kong chief Carrie Lam chuan he bill hi kalpui chhunzawm a ni dawn lo tih a sawi hnuah pawh sorkar leh Lam-i laka lungawi lohna lantir chhunzawm reng a ni. 

Mipuiten an phut angin extra­dition bill chu tihtawp a ni dawn tih sawi a nih hnuah pawh, Hong Kong mipuite chuan China lam awntu, Carrie Lam kaihhruai sorkar lakah lungawi lohna an lantir chhunzawm zel a, sorkar chuan mipuite mamawh a ngaihtuah tawk lo tih an sawi. Inrinni-a kawngzawhte hian an rama Chinese sumdawngte lakah dan khauh taka kenkawh an phut tih sawiin, ramri kaltlanga dan loa sumdawnna kalpui ṭhin chu tihtawp an phut thu an sawi. 

Nawrh huaihawttu, North District Parallel Imports Concern Group leader Ronald Leung chuan Chinese sumdawngte chungchanga chu hun rei tak an lo buaipui tawh thu leh, complaint pawh an thehlut ṭhin thu a sawi. Mahse an thusawite chu sorkar chuan a ngaih pawimawh sak lo tih a sawi a ni.