Hrekna hlih a nih chuan Iran-in US nena inbiak remti dawn
Pathianni khan Iran President chuan US-in a hrekna hlih a nih chuan inbiakna neihpui a remti dawn tih a sawi.
United States leh Iran inkarah hian nikum aṭang tawh khan inhmuhthiam lohna neuh neuh a awm a, mahse Iranian Mehr News Agency hnenah Iran president Hassan Rouhani chuan, US in Iran a hrekna a hlih a- 2015 Iran nuclear deal aṭanga a inhnuhdawhna a sut bawk chuan khawihmunah pawh, engtik hunah pawh America nena inbiak an inpeih thu a sawi.
Nikum May thla khan US chuan Iran Nuclear deal aṭanga a inhnuhdawh thu leh Iran hrekna a siam belh thu a sawi. Kum 2018 May 8 khan Iran chuan he deal hnuaia a tihtur ṭhenkhat chu chhunzawm loin a titawp ve nghal a ni. Iran chuan July 8, 2019 khan enriched-uranium a siam zat chu 3.67% aṭangin 4.5% -ah a tipung bawk.
Iran chuan US hrekna lak ata chhan turin inremna a siampui ramte, a bikin France, Germany leh United Kingdom-te chu a ngen a; Heng ram pathumte hian Pathianni khan Iran nuclear programme-a buaina awm chinfel dan tur chungchangah inbiakna an nei a ni. Ram pathumte hian thuchhuah siamin, kum li kal taa inremna an lo ziah tawh chu US-in Iran hrekna a siam thar leh avangin a tluchhe mai thei dawn tih an sawi a, hei vang hian inbiakna pawh chhunzawm leh thuai turin an ngen.
Iran nuclear deal tia sawi- Joint Comprehensive Plan of Action (JCPOA) hi kum 2015 khan Iran, US, France, Britain, Germany, China leh Russia-ten Vienna-ah an ziak a ni.