Ruahsurin Bangladesh-a Rohingya camp tichhia

Fur ruahsur nasa avangin Bangladesh-a Rohingya camp-a raltlante chenna 5,000 chuang a chhia. 

Bangladesh meteorological department chuan Rohingya Muslim raltlan maktaduai khat dawn awmna, Cox bazar district-ah chuan July 2 aṭang khan ruahtui 58.5 cm zet a tla tawh tih an sawi. International Organisation for Migration (IOM) thupuangtu chuan ruahsur vang hian lei pawh a tawlh nasa hle tih an sawi a, lei tawlh hian refugee camp pawh hi tibuaiin; raltlante awmna tur in sakte pawh a tichhe nasa hle tih a sawi. 

Kumin April thla aṭang khan camp chhungah hian leimin ṭum 200 chuang zet a thleng tawh a, mi 10-in an thih phah tawh bawk. Ruahsurin an awmna a tihchhiat avangin kar hmasa chhung khan raltlan 6,000 vel chu awmna tur mumal nei loin an awm tawh a ni. 

United Nations chuan ruahsur leh leimin vang hian zirna-in 750 chuangah zirna a khaihlak mek tih a sawi  bawk. World Food Programme (WFP) thupuangtu Gemma Snowdon chuan fur ruahtui tlain raltlante harsatna a thlen avangin chhawmdawl  hna pawh a hma aia kalpui nasat a ngah thu a sawi. "Kum 2018 July thlaa mi 7,000-te ei tur pekbelh ngaia an awm laiin, kuminah chuan ruahsur nasain harsatna a thlen avangin ṭanpuina pek belh ngai hi mi 11,400 an tling a ni," a ti.