Indonesia-a lirnghing vangin mi tam tak sawnchhuak

Indonesia khawchhak lam, Maluku Islands-ah Pathianni khan magnitude 7.3 a nain lir a nghing a, lirnghingin chhiatna a thlen vang hian mi pakhat a thi a, mi za tel chu hmun him lamah sawnchhuah an ni bawk. 

US Geological Survey tarlan danin, lirnghing inṭanna hi North Maluku province-a Ternate khaw chhim thlang lam, km. 165 vela hla a ni. Epicenter aṭanga hnai ber, South Halmahera district-ah chuan lirnghing vang hian in 160 a chhia a ni. Lirnghingin an chenna in a sawichhiat sakte hi school leh sorkar building hrang hrangah awmtir a ni. 

Magnitude 7.3-a naa lir a nghing hnu hian ṭum eng emaw zat aftershock a thleng a, mipuite chuan an la hlauhthawn avangin nimin thleng khan mi tam tak chu an inah pawh an la kir ngam lo. Nikum khan Indonesia rama Sulawesi Island-ah magnitude 7.5-a nain lir a lo nghing tawh bawk a, lirnghingin chhiatna a thlenah mi 2,200-in nunna an chan a, mi sang tel chu chin hriat lohin an awm bawk.  Kum 2004, December 26 khan magnitude 9.1-a nain Sumartra-ah lir a nghing bawk a, he lirnghing hian tsunami thlenin Indian Ocean region-ah mi 2,30,000 zetin nunna an chan a ni.