Pakistan police-ten LeT dintu Saeed an man

Pakistan police-te chuan nimin khan kum 2008-a Mumbai khawpui beihnaa mawhphurtu bera puh, Lash­kar-e-Taiba (LeT) dintu leh Jamaat-ud-Dawa (JuD) humani­tarian wing hotu Hafiz Muhammad Saeed an man. Counter terrorism de­partment police-te chuan nimina Saeed-a'n Gujranwala-a court a pan tur chu lo dangin an man a ni. 

JuD thupuangtu Nadeem Awan chuan Saeed man a nihna chhan hi sum kaih­hnawih thilah a nih thu sawiin, firfiakte suma pui ṭhinah puh a ni, a ti. JuD chuan Saeed man a ni hi court-ah an khing let nghal dawn tih an sawi a, bail-a chhuah pawh an dilsak nghal  bawk. 

LeT dintu Saeed hian he pawlah hian kum 2001 aṭang khan inhnamhnawihna a nei tawh lo tih a sawi. Kum 2008-a LeT firfiakte'n Mumbai khawpui an beih ṭuma mi 160 chuang zetin an thih phahnaah pawh khan inrawlhna a nei lo tih a lo sawi tawh a ni. Hetihlai hian LeT hian Indian security force leh India sorkar hmunte an bei fo a, a bikin Kashmir-ah pawikhawihna an thlen nasa zual a ni. 

Pakistan sorkar chuan Saeed hi ṭum eng emaw zat a lo man tawh a, mahse court-ah a appeal hnuah court chuan a chhuah leh zel a ni.