US-in Myanmar army chief hrekna siam
Myanmar sipaiten Rohingya Muslim-te laka beihpui an thlaknaa an inhnamhnawih avangin United States chuan Myanmar sipai hotu lu ber, commander-in-chief Min Aung Hlaing leh sipai hotu dang pathumte hrekna a siam.
US State Department chuan kum hnih liam taa Rohingya-te beih a nih avanga Bangladesh-a mi nuai sarih chuang zet an tlanchhiat phahnaah khan, heng sipai hotute hian inhnamhnawihna an nei ngei a ni tih finfiahna ṭha tak an nei tih a sawi.
Secretary of State Mike Pompeo chuan thuchhuah siamin, Myanmar sipai hotute chungah hian an thiltih avanga action an lak thu a tarlang. Myanmar sorkar chu an rama human rights palzutna kawnga mawhphurtute hrem tura hma la ṭha tawk loa an ngaih thu a sawi bawk.
US-in hrekna a siamsak zingah hian deputy commander-in-chief Soe Wing, Brigadier General Than Oo leh Brigadier General Aung Aung-te an tel a, an chhungte pawh telh vek an ni bawk a ni. Nikum khan US hian Myanmar security official ṭhenkhat hrekna hi a lo siam tawh bawk.