Malaysia-in Myanmar mi 1,086 thawn haw
Myanmar rama tualchhung buaina a thlen mek laiin, Malaysia chuan an rama dan loa lut Myanmar mi 1,086 te chu a thawn haw.
Myanmar sipaiten sorkar thuneihna an hnehchhuh avanga mipuiten lungawi lohna lantir a, ram chhung boruak a ṭhat loh chhoh mek avangin human rights group hrang hrangte Malaysia sorkar hnenah Myanmar mite hi thawn kir rih lo turin an ngen a ni. Mahse Malaysia chuan heng mite hian dan an bawhchhia nia sawiin, a thawn kir lui ta tho a ni.
Malaysia ram aṭang thawn kirte hi truck leh bus hmangin Thawhlehni khan military airbase panpui an ni a, heta ṭang hian Myanmar navy lawng pathum hmangin phurh haw an ni. Immigration department-a director general Khairul Dzaimee Daud chuan an vai hian Myanmar rama kir hi an remti vek niin a sawi.
Kuala Lumpur High Court chuan a hmain Myanmar mi thawn haw tumte chungthu ngaihtuah hun hi tihkhawtlai a nih avangin thawn haw tum pawh ṭhulh rih turin a ti a, mahse court thupek hi a zawm ta lo a ni. Amnesty leh Asylum Access chuan Myanmar ramchhung boruak ṭhat loh chhoh mek laia Malaysia-in Myanmar mi 1,000 chuang a thawn haw chuan a ṭhawng hle tih an sawi a, international principle of non-refoulement palzutna lian tak a ni tiin, thawn haw zinga naupangte an tel bawk avangin Malaysia chuan Convention on the Rights of the Child hnuaia a intiamkamna pawh a bawhchhia a ni, an ti.
NGO 130 chuangin sipai rorelna hnuaia a awm chhung chuan Myanmar ram hnena ralthuam leh a kaihhnawih hmanruate hralh ṭhin chu khap turin an ngen bawk. Ralthuam hi leitir chhunzawm zel an nih chuan Myanmar ram miputie hrek belh zualna hmanrua a ni thei dawn niin an sawi. Ram eng emaw zat chuan Myanmar sipaite hrekna hi an lo siam tawh a, mahse Myanmar supplier lian pahnih, China leh Russia ramte erawh an la ngawi thung.