Philipines-in phalna pek loh Covid-19 vaccine hman chhui dawn

Philippines sorkar chuan thuneituten phalna an pek ni lo Covid-19 vaccine hman a nih chungchang chu an chhui chiang dawn tih an sawi. 

Celebrity radio and televisioin host, Ramon Tulfo chuan February 23 khan nikum October thlaah vaccine a lak thu hi a sawi a, he vaccine hi a ṭhian pakhatin ram dang aṭanga a lakluh niin a sawi. Hei bakah hian President Rodrigo Duterte-a bodyguard pawh­in President hriatpuina loin vaccine hi thla hmasa khan an la nia sawi a ni bawk.

Tulfo chuan sorkar offi­cial eng emaw zat- in Sinopharm Covid-19 vaccine an la tawh niin a sawi a, heng vaccine-te hi black market-ah hmuh tur a awm nia sawi a ni. Philippines-a Food and Drug Administration (FDA) chuan Sinopharm vaccine hi an rama hman turin a la pawmsak lo a, hetih lai hian black market-a lei tur a awm nia sawi chu thil ṭha lo tak a nih thu FDA hotu Roland Enrique Domingo chuan sawiin, an chhui chiang dawn tih a sawi bawk. 

Asia ram zingah Phili­ppines hi Covid-19 kai tamna leh thihpui tamna bera zinga mi ni mah se, tun thlengin vaccine pek a la ni lo a, thuneitu lam pawhin emergency-a hman tura vaccine pawm an la nei lo bawk a ni.