Malaysia PM-in banna lehkha thehlut

Malaysia prime minister Mahathir Mohamad chuan nimin khan PM aṭanga banna lehkha a thehlut. 

Prime Minister Office chuan nimin khan thuchhuah siamin, banna lehkha hi Malaysia lal hnenah nimin chawhnu lam khan thehluh a ni tih a tarlang. 

Nikum May thlaa inthlanpui an neihah khan Pakatan Harapan (Alliance of Hope) ṭangrual pawl chuan hnehna changin, kum 92 mi Mahathir hi PM ah dah a ni. Ṭangrual pawla tel, Parti Pribumi Bersatu Malaysia (PPBM) chairman a ni bawk. 

PPBM president Myhiddin Yassin chuan Pathianni khan  an party supreme council mee­ting an neihah, ṭangrual pawl chhuahsan an rel tih a sawi a ni. Hemi hnu hian Mahathir hian PM aṭanga banna lehkha hi a thehlut ta a ni. 

Yassin chuan, "House of Representatives-a PPBM mem­­ber zawng zawng pawhin ṭang­rual pawl hi an chhuahsan tawh a, Mahathir Mohamed an thlawp chhunzawm zel tur thu ziakin an intiam vek a ni," a ti. 

Hetih lai hian ṭangrual pawla tel,  People's Justice Party hruai­tu leh Mahathir thlaktu tura beisei, Anwar Ibrahim chuan Mahathir party chu phat­santu tia puhin, kum 2018-a paihthlak, United Malays National Organisation (UMNO) nena sorkar thar siam tuma ruahmanna siamah a puh. 

Mahathir leh kum 72 mi, Anwar te hi hun rei tak politics-a inep tawh a ni a, mahse kum 2018 inthlanah khan thawk dunin, Mahathir hian a thuneihna hi Anwar hnenah a la hlan chhawng ang tiin thu an thlung an ni.