Colombia hi bawlhhlawh bawm a ni lo : PM Hun Sen
Colombia prime minister Hun Sen chuan an ram chu bawlhhlawh bawm a ni lo a, ramdangten bawlhhlawh leh hmanrua hman tlak tawh lohte an paihna hmun tur a ni lo, a ti.
Colombia ram hian United States leh Canada hnen aṭangin plastic chhia leh bawlhhlawh eng emaw zat an dawng a, Nilaini khan heng bawlhhlawh an dawn ton 1600-te chu an thawnlet vek tur thu Colombia sorkar chuan a sawi.
Bawlhhlawhte hi plastic chhia anni tlangpui a, bungraw bawmah khungin lawngin Sihanoukville lawng chawlhhmun, Colombia-ah hian phurh thlen a ni.
Colombia Environment Ministry thupuangtu Neth Pheaktra chuan Colombia chu bungraw hmantlak tawh loh paihna hmun a ni lo tih sawiin, bawlhhlawh hi US aṭangin bawm 70 leh Canada aṭangin bawm 13 an dawn thu a sawi bawk.
Sorkar thuneitute chuan he bawlhlawh an rama a lo thlen ringawt dan chhuizui tur Committee an din nghal a, eng company pawh he thila inhnamhnawih an awm chuan pawisa chawitir leh court thlenga kalpui an tum a ni. May thla khan ram 187-ten thuthlung ziakin plastic chhia thawn chhuah loh nise, tiin inremna an siam a; heihi ram tlemtein an sign ve duh lo. US hi chung ram tlemte zinga mi chu a ni.