Ramdang mite'n Wuhan chhuahsan thei
Covid 19 hri lo chhuah ṭanna hmun nia sawi China-a Wuhan khuaa khuahkhirhna siam chu thlahdul ṭan a ni a, thuneitute chuan hri kai lo, ram dang mi awmte chu he khawpui hi an chhuahsan phalsak an ni tawh tih an sawi.
January 23 aṭang khan hri leng darh tur venna atan Wuhan kalpawhna te chu khuahkhirh vek niin, pawn lam aṭanga lut leh khawpui chhunga chhuahte khap a ni. Hei vang hian Wuhan khawpuia cheng, mi nuai 11 vel chu hren zui an ni. Mahse hri leng hian ziaawm lam a pan ṭan avangin,China thuneitute chuan ram dang mi awmte chu Wuhan chhuahsan an phal thu an tarlang zui ta a ni.
Hemi rual hian Wuhan chhuahsan thei tura tihte chu chhan ṭha tak nei (special reason) an ni tur tih a ni thung. Ram dang mi Covid 19 hri kai tawh lote chuan khawpui hi an chhuahsan thei a, Covid 19 hri vang ni loa natna dang inenkawlna lak ngai te pawhin Wuhan an chhuahsan thei bawk a, anni bakah hian he natna hri leng tuarte tana thawktute pawhin Wuhan hi an chhuahsan theih thu China-a thuneitute chuan thuchhuah an siam.
Thuneitute hian Wuhan chhuahsan theihna thu an tih chhuah rual hian, Wuhan chhuahsan duhtute chuan tualchhung thuneitute hnen aṭanga phalna (permission) an lak a ngaih thu an tarlang tel bawk. Heng bakah hian car hmanga Wuhan chhuahsan tute chu driver telin mi pahnih aia tam lo tur an nih thu tarlan tel a ni bawk.
Report tarlan hnuhnung berah chuan Wuhan-ah hian hri kai thar hi mi 218 an awm. Wuhan tih lohah chuan China-a province ṭhenkhatah chuan he natna hri kai hian ziaawm lam a pan mek thu tarlan a ni. Covid 19 vanga thi hi nimin thleng khan China-ah chuan mi 2,592 an awm tawh a ni.