Pakistan PM-in senso hautak lo tura zin a tum
Pakistan prime minister Imran Khan chu karleh hian US-ah a zin dawn a, mahse a senso hautak lo turin Pakistan Air Force thlawtheihna tê chi a hmang dawn.
Pakistan hian leiba a ngah avangin sum lamah harsatna a tawk mek a, hei vang hian PM pawhin a zinna senso hi a hautak lo thei anga tih a tum. A hmaa PM-ten zinna atana an lo hman ṭhin, Pakistan International Airlines thlawhtheihna hmang loin thlawhtheihna tê chi a hmang zawk dawn a ni. US a thlen hnuah pawh hotel mantoa thleng loin Washington-a Pakistan ambassador chenna inah a thleng dawn tih a lo sawi tawh bawk.
Kum 2018-a Imran Khan kaihhruai sorkar a din hnuah khan sorkar chuan an ramin sum lama harsatna a tawh mek chinfel dan kawnga inrenchemna kalpui a lo tiam tawh a ni. Imran Khan chu an sorkar hmasa aṭangin leiba
ṭhahnem tham tak a rochun chho tih a sawi a, an ramin leiba a neih mek laka khaihchhuah dan kawng ngaihtuah pui turin an ram ṭhian ṭhate pawh a lo ngen tawh a ni. Tun hnaiah Pakistan pawisa hlutna a la tlahniam chak hle a, US dollar khat leh Pakistan rupee 160 an inhen a ni.