Myanmar sipai hotu hrek ringawt a tawk lo: UN rapporteur

Myanmar sipaiten Rohingya Muslim-te laka beihpui an thlak chungchangah, sipai hotute mawhphurtua puh vanga US-in Myanmar sipai hotu lu ber leh official lian pathumte hrekna a siam chu an la duhkhawp lo tih Myanmar-a United Nations Special Rapporteur chuan a sawi. 

Thawhlehni khan US chuan Myanmar sipai hotute hrekna hi a tichhuak. Secretary of state Mike Pompeo chuan army chief Min Aung Laing leh sipai officer lian dang pathumte chu sipaiten human rights an palzutnaah a mawhphurtute nia puhin hrek an nih thu hi a sawi. Rohingya Muslim-te thenfai hna an kalpui avanga Bangladesh rama mi 7,40,000 chuang tlanchhiat chhana mawhphurtuah a puh  bawk a ni. 

Mahse Myanmar-a UN Special Rapporteur Yanghee Lee chuan US-in sipai hotute hrekna a siam chu a tawk lo, a ti a; hei aia na zawka kal tura a duh thu a sawi. Sipai hotute chu US-a an zin khapsak ringawt loin; an thil neihte khawih chet theih loha hrek sak a ngai a ni, a ti. Commander dangte pawh hrek tel tura a duh thu a sawi bawk.

Rohingya-te beih an nih chungchangah US, Canada leh European Union chuan sipai hotu ṭhenkhat hrekna a lo siam tawh a, mahse sipai hotu lu ber erawh chu khawih tel a la ni ngai lo. Heithlai hian human rights group leh UN investigator-te chuan na zawka Min Augn Hlaing chunga action la tur hian a nawr reng thung.