Philippine President-in lockdown palzut leh Buaina siamte kahhlum phalna a pe

Philippine president Rodrigo Duterte chuan hri leng darh tur venna atana thla khat chhung inkharkhipna, lockdown a puan palzut a, harsatna siamte chu vauin, police leh sipaite hnenah dan bawhchhiate kahhlum phalna a pe mai dawn tih a sawi. 

Nilaini zana TV-a an ram mipuite hnena thuchah a sawiah, president Duterte chuan mipuite chu warning a pe tih sawiin, sorkar thupek chu zawm vek turin a ti. Hri darh tur venna atana sorkar hmalakna chu zawm vek turin mipuite a chah a, an harsatna chu a nasa zel tih a sawi. Philippine-ah hian kar thum chhungin coronavirus kai hi mi 2,311 an awm hman a ni. 

President chuan health worker leh doctor-te harsatna leh buaina thlen lo turin mipuite a chah bawk a, hei hi pawikhawihna lian tak a ni, a ti. "Police leh sipaite hnena ka thupek chu, sorkar thupek palzuta buaina siamte'n an nunna dinhmun derthawnga an dah a nih chuan kahhlum rawh u, tih a ni," tiin a sawi. 

"Tumahin sorkar palzut an tum tur a ni lo a, sorkar an cho tur a ni lo. Heng mite chu a chak lo zawk an ni zel ang, " president Duterte chuan a ti. 

Quezon City-a mi rethei venga chengte chuan kar hnih liam taa lockdown puan a nih aṭangin ei tur leh mamawh dangte an dawng ve lo nia sawiin, an chenna bial kawngpuiah nawrh an huaihawt a ni. Security officer leh police-te chuan an in lama kir turin an ngen a, mahse an zawm duh lo tih an sawi. Hei vang hian police-te chuan nawrh huaihawtte hi hnawt darh luiin, an zinga 20 an man bawk. Hemi hnu hian president Duterte chuan TV-ah thu sawiin, buaina siamte vauna thu hi a sawichhuak a ni. 

Philippine Congress chuan kar liam ta khan an rama hri leng dona kawnga hma laknaah, president Duterte hi special executive power a pe a ni.