Facebook-in Myanmar sipaite tan an platform hman a khap

Facebook chuan Myanmar army, Tatmadaw nena inzawmna neiten Facebook leh Instagram an hman khap a nih thu nimin khan a sawi a, hei bakah hian sipai nena inzawmna nei com­pany ten advertisement tih­chhuah pawh a khap nghal bawk. 

Hemi hma hian Facebook hian Myanmar sipaite Facebook main page chu a lo block sak tawh bawk a ni. Kum 2018 khan tuna Myanmar sipai hotu lu ber, Min Aung Hlaing leh senior officer 19-te account bakah sipai member-te kenkawl Facebook page leh account eng emaw zat a lo paihsak tawh bawk. 

"February 1-a sipai chakna hmanga sorkar paihthlak a nih hnuah Myanmar rama thil thleng, tharum thawhna thlengte avangin he khapna siam hi a ṭul a ni," tiin, Myanmar sipaite tana Facebook leh Instagram an hman phalsak chhunzawm zel chu a hlauhthawnawm tih a tarlang. 

Myanmar rama sipai rorelna duh lohna lantira mipuiten nawrh an huaihawtnaa buaina chhuakah nawrh huaihawt zinga mi pathum leh police pakhat an thi tawh a ni. Facebook chuan an plat­from-a Tadmadawi nena inzawm­na nei fakna dahhote pawh an khap tel vek dawn tih a sawi. Hemi rual hian public service kaihhnawih, sorkar ministry ṭhenkhat leh agency-te erawh chu khap tel an ni dawn lo tih a sawi nghal bawk. 

Sipaiten civil sorkar thu­neihna an hnehchhuh hnuah Myanmar ramchhung boruak hi a ṭha lo chho hle a, nitin sipaite chet dan duh lohna lantirin nawrh huaihawt chhunzawm reng a la ni. 

Ram chhung hmun hrang hrangah sipaite chet dan duh lohna lantira nawrh huaihawt a ni mek laiin, nimin khan Yangon khawpuiah sipai thlawptuten kawng an zawh ve bawk. 

Yangon khawpuia sipaite thlawpna lantira kawngzawhah hian mi 1,000 vel an tel nia sawi a ni. Kawng an zawhnaah hian sipai­te chet dan duh loha nawrh huai­hawtte nen an innawr buai a ni. 

Hetih lai hian Yangon univer­sity zirlaiten lungawi lohna lantira kawngzawh an tum chu police-ten dangin, university campus gate chu an dang a, zirlaite an chhuah an phal lo a ni. Nimin vek khan doctor-te chuan lungawi lohna lantirin nawrh an huaihawt bawk.