Joe Biden-a'n America mipui hnenah mask a sem dawn
US President Joe Biden chuan an rama hripui leng mek dona kawngah a kaihhruai sorkarin theihtawp a chhuahzia lantirna pakhat atan, thla thar aṭang hian America rama siam hmaituamna, face mask maktaduai 25 chuang sem a tum.
Face mask hi puitling leh naupang size te siamin, a semchhuahna kawngah hian department of defence, health and human service leh agriculture-te an thawk dawn a ni. President ruahmana ang chuan mask hi daka thawn loin, Federally Qualified Community Health Center bakah food bank leh food pantry system kaltlangin sem a ni dawn tih White House chuan a puang.
White House Covid-19 coordinator Jeff Zients chuan, "America mi zawng zawngin mask hi an vuah reng lo a, vuah reng tur an nei vek lo. Mask-te pawh a in ang vek lo bawk a ni," tiin an mask semchhuah tur hi N95 mask ni loin, Centers for Disease Control and Prevention guideline-in a ṭha tawk nia a tarlan, puan aṭanga siam a ni dawn tih a sawi.
Biden hian President aṭana lakluh a nih khan, an ram mipuite hnenah office a luah aṭanga ni 100 chhung chu pawn chhuahnaah ṭha taka mask vuah vek turin a lo ngen tawh a, hei hian nunna tam tak a chhanhim thei dawn a ni, a ti. January thla tawplama Quinnipiac poll siamah hian America mi 75% chuan pawm chhuahnaah leh midang bula an awmin mask an vuah reng thu an sawi.