Yemen-in ṭam hmachhawn mek, USD tld 3.85 a mamawh

U.N. humanitarian chief Mark Lowcock chuan Yemen ramin ṭam hlauhawm tak a hmachhawn mek tih sawiin, donor-ten ṭanpuina an pek thuai loh chuan he ram hian kum tam tak chhunga khawvela ṭam nasa ber a hmachhawn dawn a ni, a ti. 

Mark Lowcock chuan donor ram, a bikin Gulf ramte chu Yemen mipuite ṭanpui tura an chet chhuah thuai a ṭul tih sawiin, Yemen ram ṭanpuina atan hian US dollar tluklehdingawn 3.85 mamawh a nih thu a sawi. Yemen ram tana ṭanpuina pe ṭhin ramte, a bikin kum 2018 leh 2019-a sum tam tham thawhtu, Saudi Arabia leh United Arab Emirates (UAE) chuan nikum khan an sum pek hi nasa takin an titlem a ni. Hei vang hian aid agency-ten kum 2019-a Yemen mi, thla tina chhawmdawlna an pek ṭhin mi maktaduai 13-14 te chu kum 2020-ah chuan mi maktaduai 9-ah tihtlem a ngaih phah a ni. Chhawmdawlna dawng ve thei ta lo, mi maktaduai 4 vel chu an dinhmun a ṭha lo hle a, rilṭama thih mai hmabakin an awm thei mai dawn a ni, tih Lowcock chuan a sawi bawk. 

Yemen ram mipuite ṭanpuina sum chu hmanhmawh taka mamawh a nih thu sawiin, ṭanpuina hi pek thuai an nihloh chuan mi tam tak an thihbelh dawn a ni, a ti. Arab ram zinga rethei ber, Yemen ram hi kum 2014-a Iran thlawp, Houthi helten an ram khawpui Sanaa leh hmar lam bial ṭhenkhat an lak hnuah sorkar sipaite nen an la inbei chhunzawm reng a ni. Presient Abed Rabu Mansour Hadi-a'n thuneihna a neih let theihna turin US thlawpin Arab ṭangrual ram, Saudi Arabia kaihhruai chuan Houthi hel lakah hian beihpui an thlak zui bawk. Tualchhung indona thleng vang hian mi 1,30,000 velin nunna an chan tawh a, ram mipuite chu dinhmun hrehawm leh rethei takah an awm phah bawk. 

Nikum khan Yemen ram ṭanpuinaa UN in sum mamawh zat a sawi, USD tld 3.4 aṭangin USD tld 1.8 chauh a dawng a, Saudi Arabia pawhin pek a lo tiam tawh, USD mtd 500 aṭangin USD mtd 300 chauh a pe a ni.