NKorea-in hri leng lakah an la him tih sawi

Covid-19-in khawvel ram tam zawk a tihbuai mek laiin, North Korea chuan he hri leng lakah hian an ram a la him niin an sawi. 

North Korea Central Emergency Anti-epidemic department director, Pak Myong Su chuan kumin January thlaa an ṭhenawm, China ramah coronavirus vei hmuhchhuah a nih veleh khan an ramri an khar nghal a, khuahkhirhna khauh takin an kalpui nghal niin a sawi. "Tun thlengin kan ramah he hri kai hi pakhat pawh an la awm lo", a ti. 

"Ramri kan khar a, tuipui leh boruak aṭanga inkalpawhnate pawh kan dang nghal a, kan ram rawn lutte chu uluk taka enfiahin khung hran vek an ni a, hmanrua hrang hrangte pawh damdawi hmangin kah thianghlim vek an ni," a ti. 

Hetih lai hian mi tam tak chuan NKorea thusawi hi an ring lo thung a, South Korea-a US military commander General Robert Abrams pawhin NKorea-ah coronvirus kai hi an awm ngei a rin thu thla hmasa khan a lo sawi tawh a ni.