Brazil-ah Covid-19 vanga thi nuai 2.5 chuang tawh

Brazil-ah Covid-19 hri vanga thi mi nuai 2.5 chuang an tling tawh. 

Khawvela US dawta hripui leng mek tuar nasa ber, Brazil ramah hian hri kai hmuh chhuah hi maktaduai 10.3 chuang an awm tawh bawk a ni. Ningani khan he hri vanga thi hi mi 1,541 awm belh lehin, hripui vanga thi hi mi 2,51,498 an tling tawh a ni. Kar nga chhung chu hri vanga thi hi nitin mi 1,000 chuang an awm a ni. 

Covid-19 vaccine pek ṭan a ni tawh a, an ram mipui maktaduai 201 chuang zingah mi maktaduai 7.5 chuangin vaccine hi an la tawh a ni. 

Covid-19 kai tamna leh thihpui tamna ber ram, US-a California state bikah chuan he hripui vanga thi hi mi 50,000 an tling tawh bawk. US state zingah mihring tamna ber, California-ah hian Covid-19 hri thihpui hi mi 50,991 an awm tawh a, US-a he hri vanga thi zinga hmun sawma ṭhena hmun khat an tling.