US-in Syria-a helho hmunah beihpui thlak
US President Joe Biden thupek angin Ningani khan US sipaite chuan Syria-a Iran thlawp helho hmunah beihpui an thlak.
Pentagon thupuangtu, John Kirby chuan President Biden thupek angin, Syria khawchhak lama Iran thlawp helpawlten infrastructure chu thlawtheihna hmangin US sipaiten kap an tih a sawi. Hei hi February 15-a Iraq-a US embassy rocket hmanga beih a nih chhanletnaa ngaih a ni. Hemi ṭum hian US tana thawk, civilian contractor pakhat a thih bakah US service member leh ṭangrual sipai ṭhenkhatin hliam an tuar a ni.
US sipaiten Syria helho hmun an beih hi Biden a president hnua sipaiten beihpui an thlakna hmasa ber a ni. Kirby chuan, "President Biden chuan America mite leh a thawhpui dangte venghim turin hma a la zel dawn a ni," tiin sipaiten beihpui an thlakna hmun chu border control point-a Iran thlawp helpawl, Kata’ib Hezbollah (KH), Kata’ib Sayyid al-Shuhada (KSS) leh pawl dangte hmun a nih thu a sawi bawk.
Syria lam chuan he thil thleng chungchangah thuchhuah engmah a la siam lo a, mahse sorkar hnuaia Ekhbariya TV chuan Syria-Iraq border bula hmun eng emaw zat chu kah a nih thu a tarlang.