US state 16-in President Trump-a emergency puan khing let

US President Donald Trump-an Mexico ramri hungna siam tur sum a hmuh theihna tura national emergency a puan chu California state kaihhruaiin state 16 ṭangrualten an khing let. 

Congress-in ramri hungna bang siamna tura a sum phut ang a pawmpui theih loh avangin President Trump hian Congress pawmpuina lak kher ngai loa sum a hmuh theihna turin kar kalta Zirtawpni khan an ram chhim lamah emergency hi a puang a ni.

President-in emergency a puan hi Democrats lam chuan na takin an sawisel nghal a, a thuneihna hmang dik loah puhin an khing let tur thu an sawi a ni. Thawh-

ṭanni khan California state kaihhruaiin state 16 intelkhawmte chuan California North District court-ah an khinna hi an thehlut a ni. A khingtute hi California state bakah  Colorado, Connecticut, Delaware, Hawaii, Illinois, Maine, Maryland, Minnesota, Nevada, New Jersey, New Mexico, New York, Oregon, Virginia leh Michigan te an ni. 

California Attorney General Xavier Becerra chuan President-in a thuneihna a hmang sual tur hi an dang dawn tih a sawi. Mipuite chhiah pekkhawmte a duh dan ang ang hman a tumna chu an titawp dawn tih sawiin, President office chu lemchanna hmun mai mai a ni tur a ni lo, a ti. 

Court-ah an khinletnaah hian President-in ramri hungna bang siamna tur fund a pawhpen chuan sum tam tham hloh a ni dawn a, hei hian an ram economy thlengin a nghawng pawi thei dawn tih an sawi. 

President Trump hian kar kalta Zirtawpni-a White House Rose Garden-a national emergency a puan ṭum hian, emergency hnuiah hian ramri hungna siamna tur dollar tluklehdingawn 8 dawn a hmu thei dawn niin a sawi. Mahse hei hi US-Mexico ramri, km 3,200 dawna thui hungna bang siamna tura sum ruahman dollar tluklehdingawn 23 chu a la daih dawn lo hle a ni. 

Trump chuan emergency a puan tirh hian Democrats lamin an khin let ngei a rin thu pawh a sawi nghal a, mahse khing let mah se court-ah chuan hnehna a chang tho dawn niin a sawi. President chuan an ram chhim lama ramri-a security lamah harsatna awm chu chinfel a ngai tih a sawi a, ramri hungna bang siam chu a pawimawh hle tih mi zawng zawngin an hre vek a ni, a ti. Hemi rual hian emergency puan kher pawh ngai loin a tih theih a, mahse fund-te rang zawka a hmuh theih beiseiin a puang ta tih a sawi. 

National emergency puan duh lohna hian Thawhṭanni khan khawpui  hrang hrangah kawngzawh a ni bawk. Thawhṭanni khan US sorkar holiday, President's Day a ni a, mahse hemi ni hian President thiltih dana lungawi lohna lantirin hmun 250 chuangah rally huaihawt a ni. Kawngzawhte chuan Congress hnenah President Trump-a thiltih avang chuan hremna pe ngei tura an phut thute an sawi a ni.