France rama Juda thlanmual suasam

France rama Juda thlanmual chu suasam a ni a, Juda thlan 80 velah Juda tam tak suattu Nazi symbol, swatiska-te ziah a ni. 

He thlanmual hi Germany ramri bul, Alsace baila Quatzenheim khuaa awm a ni. Thlanlung an ziahranah hian hmun pakhatah kum 1979 chhoa neo-Nazi nena inzawmna nei,  helpawl  "Elsassisches Schwarzen Wolfe" ("Black Alsatian Wolves") hming ziahlan a ni. 

France President Emmanuel Macron chu Thawhlehni khan Quatzenheim khuaah kalin thlanmual suasam hi a en nghal a, he thil thleng hi a dem thu a sawi. President hian tualchhung mite leh Juda hnam hruaitute a hmu nghal bawk. 

Israel Prime Minister Benjamin Netanyahu chuan Juda thlanmual suasam a ni chu a dem thu a sawi a, France leh Europe ram hruaitute chu  Juda mi beitute laka action la turin a ngen. He thil thleng hi Juda mite tan chauh ni lo, mi dangte pawh a ṭha lo a ni, a ti. 

Israel Immigration Minsiter Yoav Gallant pawhin France rama Juda-te beihna thlen fo vang leh leh,  Quatzenheim khuaa Juda-te thlan suasam a nih leh tak avangin France Jews-te chu Israel rama haw turin a sawm. Gallant chuan, "France rama Juda thlanmual suasam hian hun kaltawha Juda mite hun tawn thim ber kha a rawn tilang nawn leh a ni", a ti. Nikum khan France aṭang hian Juda mi 2,679 chu Israel-ah hian an pem a ni. 

France ramah hian Juda huatna lam hawi thiltih leh beihna a thleng fo a, nikum khan hetianga beihna hi ṭum 500 chuang zet a thleng nia sawi a ni. France sorkar policy duh lohna lantira nawrh huaihawt mek, Yellow Vest te pawhin kar kalta Inrinni-a nawrh an  huaihawtnaah Jewish thuziaktu lar lak leh Holocaust survivor fap, Alain Finkielkraut chu ṭawngkam mawi lo taka an aukhum lai video pawh hmuh tur a awm bawk. Tun thla tir lam khan Paris-ah Holocaust survivor leh magistrate hlui, Simone Veil limah pawh swastika hi ziah a lo ni tawh bawk. 

Thawhlehni khan Paris leh France ram khawpui dangahte tunhnaia Juda mite beihna thleng ṭhin duh lohna lantirin rally huaihawt a ni.