Gaza-a intihbuainaah Palestinian 20 in hliam tuar

Gaza Strip hmarlama Israel ramri bulah Thawhlehni tlai khan Palestinian mi nawrh huaihawtte leh Israel sipaite inkara buaina a chhuak leh a, nawrh huaihawt zinga mi 20 velin hliam an tuar. 

Gaza Health Ministry thupuangtu, Ashraf al-Qedra chuan Israel sipaite silai hmehpuah Palestinian mi 20 vel hian hliam an tuar niin a sawi a, hei bakah bakah tear gas an kahchhuah vangin mi tam takin thawh lamah harsatna an tawh phah bawk tih a sawi. Hetihlai hian mita hmutute chuan Gaza ramri-a Palestinian mi pungkhawmte hian Palestinian flag vaiin Israel sipaite chu lungin an tawng niin an sawi. 

Palestinian-te hian kum 2007 chho aṭanga Israel-in Gaza Strip  kalpawhnate a dan avanga lungawi lohna lantir chhunzawmin Israel ramri bulah hian an pungkhawm leh a ni. Palestinian pawl, Hamas-te rorelna Gaza Strip-a chengte hian nikum March thla aṭanga bul an ṭan, Israel laka lungawi lohna lantirin 'Great March of Return' an huaihawt hnuaiah kar tinin rally leh nawrh an huaihawt chhunzawm reng a ni.

Gaza Health Ministry chuan 'Great March of Return' huaihawt  a nih aṭang hian Gaza Strip leh Israel ramri-a buaina chhuakah Israel sipaite chuan mi 250 chuang an kaphlum tawh a,  midang 26,000 velin hliam an tuar tawh bawk niin a sawi.