Myanmar police-te silai hmehpuahah mi 2 an thi
Myamar sipaiten civil sorkar thuneihna an hnehchhuh duh lohna lantira nimina nawrh huaihawtte laka police-ten silai an hmehpuah avangin mi pahnih an thih belh leh a, mi dang eng emaw zatin hliam an tuar niin tualchhung media-te chuan an tarlang.
Police-te hian sipaite thiltih duh lohna lantira Yangon leh chhim lama Dawei khawpuia nimina nawrh huaihawtte hnawhdarhna atan tear gas an hman bakah, silai an hmetpuak bawk a ni. Nimin zing khan Yangon-ah medical student-te chuan sipaite chet dan duh lohna lantirin kawng an zawh a, police-te chuan lo dangin an innawr buai zui a ni. Myanmar Now media group chuan Yangon khawpui Heldan Centre bula kawngpuia police-te silai hmehpuahin a awma a fuh avanga tlu video pawh an tichhuak a ni. Damdawi-in thlenpui a nih chuan a lo thi hman a ni. Dawei Watch media pawhin police-ten nawrh huaihawt zinga pakhat an kaphlum tih a tarlang bawk.
Yankin district-ah pawh nawrh huaihawta pungkhawm, zirtirtute chu police-ten hnawhdarh nan silaite an hmehpuah bakah an awmkhawmnaah grenade pawh an vawm nia sawi a ni a, zirtirtu zinga eng emaw zatin hliam an tuar a ni.
UN-a Myanmar envoy, Kyaw Moe Tun chuan UN hnenah February 1-a sipai chakna hmanga civil sorkar thuneihna paihthlak a nih chu sut a, civil sorkar a din leh theihna tura a theih ang anga hma la turin a ngen. Hei vang hian Kyaw Moe Tun hi ram phatsana puhin a hna aṭangin ban a ni zui nghal a ni.
State-run MRTV television chuan kar liam ta Inrinni khan nawrh huaihawt mi 479 man belh leh an ni tih a sawi. Hetih lai hian sipaiten nawrh huaihawt an khap chungin, khawpui hrang hrangah sipai rorelna duh lohna lantirin nitin mi tam takin nawrh an la huaihawt chhunzawm reng thung.
Court-ah Suu Kyi inlan turin ti
February 1-a sipaiten an man hnuah State Counsellor Aung San Suu Kyi chu nimin thleng khan mipui hmuhah a la inlan leh lo. A thubuai neihte hmachhawn turin vawiin hian court-a inlan tura tih a ni.
Sipaite chuan Suu Kyi hi ram dang aṭanga phalna nei loa walkie-talkie lakluh a kawl avanga leh coronavirus rules bawhchhiaa puhin thubuai an siamsak zui a ni. Vawiina a thubuai ngaihtuahnaah Suu Kyi hi court-ah inlan tura tih a ni a, mahse a lawyer-te chuan nimin thleng pawh khan an bepawp thei lo tih an sawi.