US House-in Covid-19 relief package USD trillion 1.9 a pawm

US president Joe Biden Covid-19 relief package siam US dollar trillion 1.9 chu anni huna kar liam ta Inrinni khan US House of Representatives chuan a pawm.

Democrats tam zawk awmna House of Representatives-ah hian vote lak niin package pass duh lamah hian vote 219 a tla a, duh loh lamah vote 212 a tla thung. He bill an pass hi Senate-ah thawn phei nghal niin, Senate-ah vote lak a ni ve leh ang.

Covid-19 dona kawnga pawisa tam tham tak House-in a pawm tak hi America mipuite tan chuan thil lawmawm tak a nih thu Democrats lam chuan an sawi a, an rama Covid-19 vanga thi hi mi 5,00,000 chuang an awm thu tarlangin, he hri vanga hna chan tawh hi mi maktaduai chuang an awm vangin package tam tham tak House-in a pawm hi a pawimawh a ni, an ti.

House speaker Nancy Pelosi chuan America mite chuan sorkar hi an tan a awm reng zel dawn a ni tih hre reng se a duh tih package an pass chungchangah a sawi. He package lian tham tak hi Covid-19 vanga harsatna tawk sumdawng te khaichhuah nan te, tualchhung sorkar puih nan te, hri leng vanga chhungkaw harsatna tawk puihna atan te, vaccine atan te leh damdawi ṭul danga hman tura tih a ni.

Kar liam ta Inrinnia package bill an pass-na House of Representatives-ah hian minimun wage chungchangah inhnialna (debate) neih a ni bawk a, he hunah hian kum 2009 aṭanga hman tawh US-a darkar khat chhunga minimun wage US dollar 7.25 chu US dollar 15-a tihsan an rawt a ni.