NKorea-in SKorea warning nan missile a enchhin
North Korea chuan Ningani-a missile pahnih a enchhin chu South Korea a warning na a ni tih a sawi.
Ningani khan NKorea hian an ram khawchhak lamah short-range missile pahnih a enchhin a, heng missile pahnihte hi km 430-a thui a thlawh hnuah East Sea-ah an tla a ni. Missile enchhin hi NKorea hotu Kim Jong-un pawhin a enpui veka sawi a ni bawk.
NKorea hotu Kim Jong-un leh US president Donald Trump-te chu June thla khan Korea ram pahnih inṭhenna, demilitarised zone (DMZ)-ah an inhmu a, nuclear ralthuam tihbo dan chungchang sawia inbiak zui pawh an remti a ni.
Ram pahnihte hian inbiakna neih chhunzawm remti mah se, NKorea chuan US-South Korea joint military service neih tur chu a helh hle a, hei hian inbiakna an neih tur pawh a tichhe thei tih a sawi. South Korea ramah hian US sipai 30,000 an awm mek a, US sipai leh SKorea sipaite hian kumtin nunchan an zirho ṭhin a, hei hi NKorea chuan a hma pawhin a lo sawisel fo tawh.
Kim Jong-un chuan SKorea chu hmai hnih nei, Korea ram pahnihte tana remna leh muanna sawi reng chunga, ralthuamte lalut leh US sipaite joint military exercise neihpui leh ṭhinah a puh. SKorea hruaitute chuan NKorea-in warning a pek chu an ngaihthah mai tur a ni lo, tiin state media KCNA chuan a tarlang.