Khawvel ram hruaitu upa ber -Tunisia President Essebsi thi

Tunisia mipuiten kum 2011-a democracy ram an nih hnua an ram hruaitu, President ni tura an thlan hmasak ber leh President nilai Beji Caid Essebsi chu Ningani zing khan a thi.

Beji Caid Essebsi hi kum 92 a ni tawh a, khawvela ram hruaitu nilai upa ber a ni. President office chuan Essebsi chu Tunisia military hospital-ah Ningani zing khan a boral tih an puang. Essebsi hi June thla tawp lam aṭang tawh khan damdawi-inah enkawl a ni a; Ningani khan ICU-ah dah luh a ni.

Tunisia revolution laia presi­dent - Zine El Abidine Ben Ali rorel­na hnuaiah khan Essebsi hi prime minister a ni. Zine El Abidine Ben Ali khan 1987 aṭangin Tunisia-ah ro a rel ṭan a, ram mipuiin democracy ram nih duhin lungawi lohna leh sorkar paihthlak tumna vawi eng emaw zat an chawkchhuak. Kum 2011-a Ben Ali paihthlak a nih hnu kum thumah, Essebsi hi democracy kalphung diktak hmangin Pre­sident atan thlan a ni.

Prime Minister a nih lai khan Tunisia-ah fundamental rights: freedom of speech leh free elections huam tel constitution thar duanna kawngah sulsutu ber a ni a; Essebsi-a movement din, Nidaa Tounes chuan remna kawng zawnga hma an lakna vangin 2015 khan Nobel Peace Prize an dawng.

Essebsi hi critics-te chuan a rorelna chu a fapa kuta hlan chhawn tumah an puh a; Ben Ali hunlaia roreltu an mante chungah rorelna dik a thlentir lo, an ti bawk. Essebsi hian a thih hma khan November thlaa election lo awm tur chuh a tum tawh loh thu sawiin;, naupang zawkte ken a tum thu a sawi.