Pakistan eptuten 'black day' an hmang

Pakistan-a eptu pawlte chuan Ningani khan prime minister Imran Khan kaihhruai sorkar duh lohna lantirin 'black day' an hmang.  

Ningani kha PM Khan kaihhruai sorkarin kum khat a tlinna a ni. Hemi ni denchhen hian sorkar lakah lungawi lohna lantirin, Karachi, Peshawar, Lahore, Quetta leh Pakistan khawpui Islamabad-ahte 'black day' hi hman a ni a, tel an ṭhahnem hle. Nawrh huaihawt hi Pakistan Muslim League-Nawaz (PML-N) leh Jamiat Ulema-e-Islam-Fazl (JUI-F) party leader-ten an ho.

Eptute chuan nikum inthlanah khan Imran Khan party, Tehreek-e-Insaf (PTI) party chu vote tichingpen leh, dik lo taka tlingah an puh. Pakistan PM Imran Khan hian nikuma office a luah tirh phat aṭangin eiruk dodalna lamah 

ṭan a la hle a, eptu pawl zinga mi pawimawh tak tak pawh eng emaw zat man an ni tawh a ni. Man zingah hian PM hlui Nawaz Sharif, a unaupa Shehbaz leh, PM hlui Shahid Khaqan Abbasi-te pawh an tel. Eptu party, Pakistan People's Party hotu leh Pakistan president hlui Asif Ali Zardari-te pawh eiru a puh avanga man an ni tawh bawk. 

Hetihlai hian eptu lam chuan sorkarin eirukna do hna a thawhnaah eptu party mite chauh a beiin an sawi. Mahse Imran Khan chuan Pakistan political system thenfai hna an thawk tih a sawi thung a, Pakistan rawk tumtuten an lo tihchhiat tawhte siamṭhat hna an thawk mek tih a sawi.