Court-ah Myanmar hruaitu Suu Kyi inlan Thubuai pahnih siamsak belh leh a ni

Myanmar ram hruaitu aṭanga sipaiten an paihthlak tak, Aung San Suu Kyi chu nimin khan video link hmangin Nay Pyi Taw court-ah a inlan a, thubuai dang pahnih siamsak zui a ni leh bawk. 

February 1-a sipaiten civil sorkar thuneihna an hnehchhuh hnuah Suu Kyi hi manin an hreng zui nghal a ni. Kum 75 mi, National League for Democracy (NLD) hruaitu Suu Kyi hi sipaiten an man hnuah nimin kha hmuh theih tura a inlan lehna hmasa ber a ni a, a hriselna pawh a ṭhat hmel nia sawi a ni. Hren a nihna hmun hi tun thlengin sawilan a la ni lo. 

Man a nih hnuah Suu Kyi hi ram dang aṭanga phalna nei loa walkie talkie radio paruk laluta puhin thubuai siamsak a ni a, a hnuah coronavirus hripui a len laia campaign rally a huaihawt avangin natural  distaster law bawhchhiaah puhin thubuai dang siamsak a ni leh bawk. Heng thubuai pahnihah hian thiam loh chantir a nih chuan kum thum thleng lungin tantir theih a ni ang. 

Nimin khan colonial-era penal code, mipuite tichiai leh tiralṭi zawng  emaw, mipuia buaina thlen zawnga information tihchhuah khapna hnuaiah Suu Kyi hi thubuai dang siamsak belh leh a ni. Hei bakah hian telecommunication law hnuaiah thubuai pawh an siamsak bawk niin a ukil chuan a sawi. A thubuaite hi March 15-ah ngaihtuah leh a ni ang.  

Suu Kyi-i lawyer pakhat, Khin Maung Zaw chuan nimina hearing neih hma hian Suu Kyi-i hi a legal team chuan an be thei lo tih a sawi. Sipaiten an hren mek bawk, president Win Myint pawh buaina chawk chhuak tura mipuite fuihah puhin thubuai siamsak a ni bawk niin Myanmar Now chuan a tarlang. 

Nimina court-ah Suu Kyi a inlan lai hian, Yangon khawpui leh khawpui dang eng emaw zatah  sipaite laka lungawi lohna lantirin mipui an pungkhawm leh a,  police-te chuan pungkhawm hnawhdarh nan hian tear gas leh stun grenade-te an hmang. 

Yangon-a nawrh huaihawtnaa tel tam zawkte chuan police-ten an beih letna laka invenna turin lukhum an khum a, a hmatawnga awmte phei chuan shield-te an hmang a ni. Mandalay khawpuiah pawh mi tam takin kawng zawhin, Shan state-a Lahsio-ah pawh mi eng emaw zat an pungkhawm bawk. 

Pathianni khan Yangon, Man­dalay, Dawei leh khawpui danga kawngzawhte chu police-ten tear gas hmangin an phuh bakah, silaite pawh an hmetpuak bawk. United Nations chuan thu rintlak tak an dawn aṭangin, Myanmar rama sipaite duh lohna lantira nawrh huaihawt zinga mi 18 an thih tawh thu leh, mi tam takin hliam an tuar tawh bawk niin a sawi. Hetih lai hian independent television leh online news outlet, Democratic Voice of Burma chuan thi zat hi 20 an chuang tawh niin a sawi thung. 

UN Human Rights Office chuan Yangon, Dawei, Mandalay, Myeik, Bago leh Pokokku-ah police-ten nawrh huaihawtte lam hawia silai an hmehpuah vangin pungkhawm zingah thi an awm a ni, a ti. Hei bakah hian khawpui dang eng emaw zatah nawrh huaihawtte hnawhdarh nan police-te chuan tear gas bakah stun grenate-te an hmang ṭhin tih a sawi bawk. 

Assistance Association for Political Prisoners chuan Pathianni khan nawrh huaihawt zinga mi 270 man an ni leh tih sawiin, sipai chakna hmanga sorkar paihthlak a nih hnua mante hi an vaiin mi 1,132 an tling tawh a ni, a ti.