Bangladesh-a warehouse kangah mi 69 thi

Bangladesh khawpui, Dhaka-ah Nilaini zan khan chemical leh plastic warehouse atana hman building eng emaw zat a kang a, mi 69 an kanghlum. 

Old Dhaka-a Chawkbazar area-a Mosque bula Hazi Wahed Mansion aṭangin zan dar 10.40 velah kangmei hi a chhuak ṭan a, be building hi chhawng li-a sang niin chemical warehouse atana hman a ni. Kangmei chhuak hian a bula building pali chu rang takin a man kai a, heng zingah hian community centre pawh a tel. 

Fire official-te chuan kangmei chhuakah hian mi 69 an kanghlum tih sawiin, mi 50 hliam an an tuar tih an sawi a, thi zat pawh hi an la punchoh mai theih thu an sawi. Kangmei chhuaka thi zingah hian building chhunga awm ni lo a, a bul hnai restaurant-a thil eia chawlte pawh an tel niin an sawi bawk. Car pahnih leh cylce rickshaw 10 pawh a kangchhe tel a ni.

Kangmei a chhuah thu hriatir an nih hnuah hian kangṭhelhtu 200 chuang tirh nghal ni mah se a lo nasat hman tawh avangin an ṭhelh mit mai thei lo a ni. 

Kum 2010 khan old Dhaka-ah hian chemical warehouse kangah mi 124 an lo thi tawh bawk.

Nilaini zana kangmei chhuahna, Chawkbazar hi Old Dhaka-a hmun pawimawh ber zinga mi niin kum 400 kalta Mughal dynasty hunlaia din a ni. Chemical business leh perfume factory-te awmna hmunpui a ni a, mahse kum 2010-a kangmei nasa tak a chhuah hnuah khan thuneitute chuan chemical goods chhekkhawl an khap tawh a ni.