US-in Maldives ṭanpui nan dollar mtd 9.5 pe dawn

United States sorkar chuan Maldives ram nena an inlaichinna tihnghehna tur kawng khat atan ṭanpuina US dollar maktaduai 9.5 pek a tum tih a sawi. 

US-a cham mek, Maldives Foreign Minister Abdullah Shahid leh US Secretary of State Mike Pompeo-te chu Washington-ah inkawmin, ram pahnihin inlaichinna thuk zawk an siam dan turte an sawidun a ni. Shahid chuan Maldives rama democracy chawinung tur sorkar hmalakna pawimawhte a sawi lang a ni. 

State Department Deputy Spokesperson Robert Palladino chuan US-Maldives thawhdunna ṭha zawk siam zel Pompeo-an a duh thu te sawiin, Maldives ram ṭanpuina tura dollar maktaduai 9.5 pek a nih tur hi a puang nghal tih a sawi.

Ram pahnih hruaitute hian aviation security-a thawhdunna zau zawk siamna tur inremna pawh an ziak nghal a ni.