Hanoi-ah NKorea palai thleng tawh

Vietnam khawpui, Hanoi-a US President Donald Trump leh North Korea hruaitu Kim Jong-un-ten summit vawi hnihna an neih tur atan Nilaini khan NKorea special representative Kim Hyok Chol kaihhruai official-te chuan Hanoi an thleng. 

Donald Trump leh Kim Jong-un-te hian February 27 leh 28 hian summit an nei dawn a ni. Summit neih tur atana inbuatsaih hian US palai Stephen Biegun pawhin tun kar tawp lam hian Hanoi a pan dawn a, Kim Hyok Chol nen hian an inhmu ang. Biegen leh Kim Hyok Chol-te hi thla hmasa khan NKorea khawpuiah an lo inhmu tawh bawk. 

Kim Jong-un chuan karleh hian relin Hanoi hi a pan dawn. Pyongyang aṭangin China kaltlangin relin Hanoi hi a pan dawn a, ni hnih leh a chanve vel zel hun a hmang dawn a ni. Kim-a chuanna rel hi Vietnam ramri bul Dong Dang station-ah dingin, heta aṭang hian km 170-a hla, Hanoi chu car-in a pan dawn a ni. Kim hi Melia hotel-ah a thleng dawn nia sawi a ni. 

Vietnam Prime Minister Nguyen Xuan Phuc chuan summit organising committee hnenah summit neihna turah hian security lam chu an dah pawimawh ber tih sawiin, Government Guest house bula Metropole Hotel chu backup location atan dah a ni bawk tih a sawi.