Democrats-in House-ah emergency danna tur resolution putluh tum

US President Donald Trump-an national emergency a puan chu Democrats lam chuan na takin an sawisel a, state 16-ten President emergency puan hi court-ah an khing let tawh a, Democrats chuan emergency tihtawp a nih theihna tur hian US House of Representatives-ah resolution putluh an tum. 

President Trump hian US-Mexico ramri hungna bang siamna tura a sum phut ang chu Congress-in a pawmpui theih loh vangin a sum duh ang a hmuh theihna turin kar kalta khan national emergency hi a puang a ni. Hei hi Democrats lam chuan na takin an sawi nghal a, President chu a thuneihna dik lo taka hmangah an puh. 

House of Repre-sentatives hi Democrats lam thuneihna a ni. Representative Joaquin Castro-an border security chungchanga President emergency puan tihtawp a nih theihna tura resolution putluh a tum hi lawmaker 92 in an thlawp thu an sawi tawh. House Speaker Nancy Pelosi chuan Democratic leh Republican member-te hnenah Castro-a resolution hi thlawp tura ngenin lehkha pawh a thawn a ni. 

House leh Republican chakna, Senate-ah hian majority vote hmangin emergency hi hnawl theih a ni ang. Mahse hei hi President hnenah thlen leh phawt a ngai dawn a, Trump hian a thuneihna hmangin a lo hnawl, veto sak leh ngei rin a ni. President veto hnawlsak leh tur hian chamber pahnihah vote hmun thuma ṭhena hmun hnihin an thlawp a ngai leh dawn a ni.