Pakistan president hluiin an ram PM sawisel

Pakistan president hlui Asif Ali Zardari chuan an ram Prime Minister Imran Khan chu Pulwama, India rama CRPF convoy beihna thlenga India-in Pakistan a puh chungchanga a chhan let loh avangin a sawisel a, PM chu puitling lo lutuk tiin a sawi. 

Nilaini-a Islamabad-a press conference a neihah Zardari hian hemi chungchang hi a sawichhuak a ni. 

"Thuneihna ka chan lai khan, India rama Mumbai chu beih niin Pakistan chu mawhphurtuah puh kan lo ni tawh bawk. Mahse hemi chungchang hi tihdan tur dik tak hmangin an do let a, India pawh inphahhnuai turin kan nawr a, inbiakna hmangin chinfel dan kawng kan zawng thei a ni",  a ti. 

Prime Minister Imran Khan chu 'back seat driver' tia sawiin, midangte duhdan ang zela thiltiah puhin hei vang hian boruak pawh a chhiat zual phah niin a sawi. 

Pulwama district-a India sipaite beihna thlengah Pakistan a inhnamhnawih nia India-in a puhna chu PM Khan hian a pha a, he thil thleng chhui tur hian India chu puih an inhuam thu a sawi a ni. Pulwama pawikhawihna thlengah Pakistan mi inrawlh an awm a ni tih finfiahna an pek theih chuan hrem lohin an chhuah dawn lo tih a sawi a ni.