Myanmar official leh Rohingya hruaitute inkawm

Bangladesh chhim lam, Cox' Bazar district-a Myanmar aṭanga Rohingya raltlante awmna chu kar liam ta Inrinni khan Myanmar sorkar aiawhten an tlawh a, Rohingya Muslim hruaitute nen an inkawm. 

Bangladesh foreign mi­nistry-a director general Md Delwar Hossain chuan Myanmar sorkar palaite hian raltlante hi kawmin, an rama kir leh turin an sawm tih a sawi. Myanmar palaite hi member 15 an ni a, Myanmar foreign ministry-a permanent secretary Myint Thu-a'n a ho. Rohingya hruaitute nen hian darkar li zet an inkawm a ni. 

Kum 2017-a Myanmar sipaiten Rakhine state-a beihpui an thlak avang khan Rohingya Muslim nuai sarih chuang chu Bangladesh ramah an tlanchhia a ni. Heng raltlante hi Box's Bazar-a camp-ah an khawsa mek. Bangladesh leh Myanmar sorkar chu raltlante hruai kir chungchangah hian inbiain, kum 2017 November thla khan inremna pawh siam mah se raltlan tam zawk hian Myanmar rama kir chu an tan a la him lo nia an hriat avangin kir an la duh lo a ni. Nikum November thla khan raltlante hruai kir hna hi kalpui ṭan an tum a, mahse Rohingya zingah tumah kir duh an la awm lo a, Bangladesh sorkar chuan tihluihna hmanga kir tir a tum lo tih a sawi bawk.