China-in Hong Kong-a nawrh huaihawt a dem

China chuan tunhnaia Hong Kong-a sorkar laka lungawi lohna lantira nawrh huaihawt a ni fo chu a dem thu a sawi. 

Hong Kong-ah hian a zawnin kar riat chhung chu kartawp apiangin sorkar laka lungawi lohna leh, democracy thlawpna lantirin nawrh huaihawt a ni ṭhin. Nawrh huaihawtte leh police-te pawh an innawr buai fo bawk. 

China sorkar hnuaia Hong Kong and Macau Affairs Office chuan nimin khan thuchhuah siamin, buaina chawhchhuah duhtuten pawikhawihna an thlente chu a dem thu a sawi. Hong Kong mipuite chu boruak ṭha lo tak an tawh mek chungchang chu hre chiang turin a chah bawk. 

Hong Kong sorkarin danin thiam loh a chantir tawhte mainland China-a thawn an nih theihna tur, extradition bill hman a tum avangin lungawi lohna hi lantir ṭan a ni. Mipuiten he bill hi nasa taka dodal a, lungawi lohna an lantir chhunzawm reng avangin Mipuite chuan he bill hi Hong Kong-in zalenna a neihte tihchhiatna tur leh, political activist-te beihna hmanrua mai tur niah an ngai. Hong Kong sorkar hotu, Carrie Lam pawhin bill hi kalpui a ni dawn lo tih a sawi a ni. Mahse heti chung hian mipuite chuan nawrh an huaihawt chhunzawm reng a, Lam chu bang turin an phut bawk.