Pakistan sipai thlawhtheihna a chesual

Pakistan sipai thlawhtheihna chu training a neih laiin nimin khan chesualin Rawalpindi khaw­daia mihring chenna hmun­ah a tla. Thlawhthleihna chetsual vang hian mi 17 an thi a, thi zinga a tam zawk chu a tlakna hmuna lo awmte an ni. 

Thlawhtheihna chesuala thite hi civil mi 12 leh sipai panga an ni. Sipai thi zingah hian pilot pahnih an tel. Thite hi an ruang a kangchhe hneh hle a, tunge an nih hre tur chuan DNA test a ngai dawn tih rescue service thupuangtu Farooq Butt chuan a sawi. 

Mora Kalu khuaa thlawh­theih­na tlakna hmunah hian kangmei a chhuak nghal a, chenna in eng emaw zat a chhe bawk a ni. Sipaite leh police-te chuan chetsualna hmun hi pan nghalin, mipui tlawh theih loh turin an khar. Chhanchhuah hna thawh zawh hnuah chetsualna thlen dan pawh chhui zui nghal a ni dawn tih an sawi bawk. 

Pakistan hian aviation safe­ty record a nei ṭha lo viau a, thlawh­theihna leh helicoper chet­sualna a thleng fo a ni. Kum 2016 khan Pakistan International Airlines thlawhtheihna chu a turboprop engine pakhat a ṭhat loh avangin a kang tawh a, mi 40 chuang an thi a ni. Pakistan rama thlawhtheihna chetsualna thleng rapthlak ber chu kum 2010-a Airbus 321 tlak kha a ni a, Islamabad khaw daia tlang suin a tla a, thlawhtheihnaa chuang mi 152 chu an thi vek a ni.