Brazil tan ina intihbuaina thlengah mi 57 an thi

Brazil-a Para state tan in chhunga intihbuaina thlengah mi 57 an thi. Thi zinga mi 16 chu an lu tansak an ni. Thuneitute chuan an ram huna Thawhṭanni zing dar 7 vel khan Altamira khuaa tanin chhunga pawl pahnih inkarah buaina hi a chhuak tih an sawi. Comando Classe A gang-te chuan an hmelma, Commando Vermelho pawlte tanna pindan an  halsak. Thi zinga a tam zawk hi meikhu an hipluh nasat vanga thi an ni. 

Tangho hian tang vengtu pahnih pawh an hreng a, mahse a hnuah an chhuah leh nghal. Official-te chuan buaina chhuah chhan hi tang vengtute beihna lam ni loin, pawl pahnih inkara inhriatthiam lohna awm vang a ni tih an sawi. Brazil justice ministry chuan buaina chhuaka mawhphurtute zawngchhuak turin Para state thuneitute an thawhpui thu a sawi a, gang leader-te hi tanin hranah sawn an ni tawh bawk. 

Brazil hi khawvela tang tamna ram pathumna a ni pha a, tang awm zat hi nuai sarih an tling. Tanin tam zawk chu an tawt hlawm hle a, buaina pawh a chhuak fo a ni. Buaina chhuak tam zawk hi tanin chhunga pawl leh pawl inkara intihbuaina thleng ṭhin vang a ni.