France President hlui eiruk thubuaiah thiam loh chantir

Paris court chuan France president hlui Nicolas Sarkozy chu eiruk thubuaiah thiam loh a chantir a, kum thum lung in tang turin a hrem.

Sarkozy hi modern France president ni tawh zingah eiruk thubuai thiam loh chantir pahnihna a ni a, a hmain president hlui Jacques Chirac chu thiam loh chantir a lo ni tawh bawk. 

Kum 66 mi, Sarkozy hi kum 2007-2012 inkar khan France President a ni a, Thawhṭanni khan kum 2014-a senior magistrate hnen aṭanga dik lo taka information lak tumah puh a nih chungchangah court chuan thiam loh a chantir a ni. Hetih lai hian Sarkozy ukil chuan court sang zawkah an appeal tur thu a sawi. Appeal tur hian ni 10 hun an nei a ni. President hlui chuan an puhnaah hian dik lohna engmah a nei lo tih a la sawi reng thung. 

President hlui hremna pek hi one-year prison leh two-years suspended a ni a, kum hnih  hi chu lung ina tang kher loin, electronic bracelet vuaha a chenna ina hreng turin a ngen thei dawn a ni. Kum 2012-a France President thlanna neih dawna a campaign-ah dan kalha a campaign-na tur sum dawngah puh chungchangah tun thla tawp lam hian Sarkozy chungchang hi ngaihtuah a la ni leh dawn a, he thila inhnamhnawiha puh mi dang 13 thubuai pawh ngaihtuah nghal a ni ang.