Nigeria : School naupang rukbote chhuah an ni

Nigeria hmarthlang lam, Zamfara state-a boarding school aṭanga zirlai hmeichhia rukbote chu chhuah vek an nih thu nimin khan Governor Bello Matawalle chuan a sawi. 

Governor chuan zirlai hmeichhe  naupangte hi thuneitute kuta an awm tawh tih sawiin, tlanchhuahna atan sorkarin sum engmah a pe lo tih a sawi bawk. 

Police-te chuan zirlai hmeichhia 317-te chu kar liam ta Zirtawpni khan silai keng mi 100 chuangten an school, Jangebe khuaa Government Girls Secondary School an beih hnuah an rubo tih an sawi a, mahse Governor chuan rukbote hi mi 279 an ni tih sawiin,  zirlai ṭhenkhat chu an tlanchhe hman niin a sawi thung. 

Sorkar official-te chuan zirlai rubotute hi inbiakna an neihpui nghal a, hemi hnu hian heng zirlaite hi an vaiin chhuah zalen an ni leh ta a ni. President Muhammadu Buhari chuan zirlaite chhuah an ni chu lawmawm a tih thu sawiin, sorkar official-te hmalakna a hlawhtling thei chu a lawm hle tih a sawi.