Kar 7 hnuah khawvelah Covid-19 hri kai pung chho leh

World Health Organization (WHO) chuan  khawvela hripui leng mek, Covid-19 hri kai thar chu kar sarih chhung a tlakhniam zel hnuah, kar liam ta khan an pung chho leh tih a sawi. 

WHO director-general Tedros Adhanom Ghebreyesus chuan inkhuahkhirhnate thlahdul chhoh a nih hnua hri kai an pung chho leh chu thil mak a ni lo tih a sawi a, hemi rual hian a pawi a tih thu a sawi. Khawvel hmun hrang hrangh, Africa leh Western Pacific region tih lohah chuan hri kai hi an pung chho leh niin a sawi a ni. 

"Hri kai an pun chhoh lehna chhan nia lang chu inkhuahkhirhna thlahdul vang te, hri chi thar a pun belh vang leh mipuite inthlahdah tak vangte niin a lang," tiin Tedros chuan a sawi. UN health agency-a Covid-19 technical leader Maria Van Kerkhove chuan hri kai an pung leh ṭan chu mitin tana inralrinna tura hriattirna a ni tiin, an inthlahdah chuan he hri leng hi a rawn let ṭha leh dawn a ni, a ti. 

John Hopkins University data-a a landanin, khawvel pumah Covid-19 hri kai hmuh chhuah tawh hi maktaduai 114 chuang an awm tawh a, mi maktaduai 2.5 chuangin an thihpui tawh bawk. Tedros chuan ram eng emaw zatin Covid-19 vaccine an pe chhuak mek tih sawiin, "Mahse vaccine pek chhuah ringawt buaipui a, hri leng dona kawnga hmalakna dangte ngaihtuah chu a la hun lo a ni," a ti. Vaccine an pek tawh avanga ngaihṭha taka an awm chuan an tisual dawn tih a sawi.