UAE ambassador-in Israel thleng ta

United Arab Emirates (UAE) in Israel rama ambassador a dah hmasak ber tur, Mohamed Al Khaja chuan Thawhṭanni khan Israel a thleng a, Israel President Reuven Rivlin nen a lawmna alo buatsaih a ni.  

US president hlui Donald Trump hmalakna Israel leh UAE-in Abraham Accords hnuaia thawhdunna tur inremna an siam hnuah, UAE hian Israel rama a palai dah hmasa ber tur hi a ruat a ni. Israel pawhin January thla khan UEA-ah embassy a hawng tawh bawk. Abraham Accords hi Bahrain, Morrocco leh Sudan pawhin an zawm ve leh bawk. 

Israel President Rivlin chuan UAE nena inzawmna an siam chu lawmawm a tih thu sawiin, Jerusalem-a President chenna ina Israel flag bula UAE flag zar a ni chu thil chhinchhiah tlak leh hriatreng tur a ni, a ti. Israel mipuite chuan UAE palai chu an lo lawm takzet tih a sawi. 

Thawhṭanni khan UAE amba­ssador Khaja hian Jerusalem-ah Israel foreign minister Gabi Ashkenazi a hmu nghal a, nimin khan Israel-a Holocaust memorial leh education centre, Yad Vashem leh education centre a tlawh. Tun kar hian prime minister Benjamin Netanyahu pawh a hmu dawn a ni.