Israel inthlanah Benjamin Netanyahu chak

Israel ram inthlanpui, Thawhṭannia neih zawh takah prime minister Benjamin Netanyahu party, Likud party kaihhruai, right wing bloc chuan seat 59 an la. Seat 120 awmna, Israel Parliament-a majority nei tura seat neih ngai zat chu seat hnihin an pha lo.

Kum 70 mi, Netanyahu hi Israel prime minister ni rei thei ber a ni. Kum 1996-1999 khan a ṭum khatna atan PM niin, hemi hnu kum 2009 aṭang khan PM dinhmun hi a la chelh chhunzawm reng a ni. Ṭangrual sorkar a siam theih a, PM atana dah leh a nih chuan PM term nga a chelhna tur a ni ang. 

Hetih lai hian Netanyahu hian thamna sum la leh thu­neihna dik lo taka hmanga puhna thubuai pathum a nei mek a, March 17 hian court-ah a inlan ang. Mahse Netanyahu chuan an puhna te hi thu dik lo niin a sawi thung. A thubuaiah hian thiam loh chantir a nih pawhin a appeal thei dawn a, a appeal-na ngaihtuah fel a nih hma chuan prime minister a nihna aṭanga a ban kher a ngai dawn lo a ni. 

Thawhṭannia Israel inthlan neih hi thla 12 chhunga inthlanpui an neih ṭum thumna a ni. Inthlan neih hmasa pahnihah party mala sorkar siam thei an awm lo a, party lian pahnih hruaituten ṭangrual sorkar an siam thei lo bawk. Sorkar a din theih loh vangin inthlan hi buatsaih nawn leh a ngai a ni.  

President Reuven Rivlin chuan sorkarna siam thei tur bera a rin ber party chu sorkar thar siam tur hian a sawm dawn a ni. Likud party hian party malin seat 37 a la a, right wing bloc hnuaia a thawhpui party dangte nen seat 59 an la a ni. Netanyahu-a khingpui ber, Benny Gantz-a kaihhruai Blue and White party chuan seat 33 a la bawk. 

Netanyahu chuan Tel Aviv-a thu a sawinaah ring wing block chuan majority nei pha chiah lo mah se sorkar nghet tak siam a tiam. "Inthlan nawn leh ngai tawh lo tura hma kan lak a ngai. Kan inkara inhriatthiam lohna dah ṭha in, kan thawhho a hun tawh a ni," a ti.