Venezuela-in Brazil ramri a khar
Venezuela President Nicolas Maduro chuan Ningani khan an ram chhim lama Brazil nena an inri-na chu khar turin thupek a tichhuak.
President Maduro chuan an ram huna Ningani zan dar 8 aṭang khan Brazil ramri khar turin a ti a, thupek dang siam a nih leh hma chuan khar a nih tur thu
a sawi.
Brazil ramri khar a nih chhan chu Brazil-a right-wing sorkar thiltih dana an lungawi loh vang niin a sawi. Maduro chuan Colombia nena an ramri pawh kharah a vau nghal bawk.
National Bolivarian Armed Forces high command meeting neihnaah he thu hi sawiin, Maduro chuan ramri khar chu duh loh viau mah se, an ram tana ṭha tur a ngaihtuah thu sawiin Colombia ramri khar tur chungchang pawh a ngaihtuah mek tih a sawi.
Colombia leh Brazil hian Veneuzela eptu pawlten Maduro leh rorlellai socialist PSUV party paihthlak tuma an campaign an thlawp a ni.
Nilaini khan Venezuela sorkar chuan a ṭhenawma Aruba, Curacao leh Bonaire thliarkarte nena thlawhtheihna leh lawng hmanga an inkalpawhna pawh tihtawp a nih thu a lo puang tawh bawk.
Maduro hian US-in an ram mipuite chhawmdawlna tur a thawn chu lakluh duh loin, Colombia ramri bulah sipaite a lo dantir a ni. Sorkar chuan sipaite hi crossing point pawimawhah dah vek an ni dawn tih a sawi.
Hetihlai hian eptu pawl hruaitu leh National Assembly hotu, Juan Guaido chuan chhawmdawlna chu lakluh a nih theih nan theihtawp a chhuah zel dawn tih a sawi. Colombia ramri-a chhawmdawlna thawn luh tur dahkhawmte chu lalut turin vawiin thleng sorkar chu hun a pe a ni. Ningani khan eptu hruaitute chuan a rualin Colombia ramri hi an pan a ni.
US leh Colombia-in Venezuela tana chhawmdawlna a thawn tam tham tak chu ramri bul, Colombia ram china warehouse-ah dah a ni. Guaido chuan Ningani khan Chile pawhin chhawmdawlna eng emaw zat a thawn belh tih a sawi a, Brazil sorkar pawhin a ramri kaltlangin chhawmdawlna a thawn luh thu a sawi.
Maduro chuan US leh a thurualpui ramten chhawmdawlna thawn an tum dan chu an ram laka infiamna kalpui an tumna nia sawiin, an ram tana thinurthlak tak a nih thu a sawi. An ram inrelbawlnaa US sipaite inrawlh tir tumna hmahruai a ni, a ti. "US chuan kan ramah buaina siam a tum a, mahse an hlawhtling lo. Kan ram chuan muanna kan duh a ni", tiin a sawi.