Pakistan-in Hafiz Saeed-a kaihhruai JuD khapna tichhuak thar leh

Pakistan sorkar chuan Hafiz Saeed-a kaihhruai Jamat-ud-Dawa (JuD) leh an pawl charity wing Falah-e-Insaniat Foundation khapna thupek a tichhuak thar leh. 

Kum 2008-a Mumbai khawpui beihnaa mawhphurtu bera puh Hafiz Saeed-a pawl, JuD hi United Nations chuan firfiak pawlah a lo puang tawh a ni.  

Pakistan Interior Ministry thupuangtu chuan JuD leh a charity wing khapna siamthar lehna tur hi Prime Minister Office-a National Security Committee (NSC) meeting-ah rel a nih thu a sawi. A hmain heng pawl pahnihte hi interior ministry watchlist-ah telh an lo ni tawh.

February 14-a India rama firfiakten sipai convoy an beihnaa sipai 40 zet thihna thleng chungchangah Pakistan chu inrawlha puh niin ram pahnihte inkar boruak pawh a chhiat phah hle. He thil thleng vang hian Pakistan sipaite pawhin Hafiz Saeed hi intarlang tam lo turin an hrilh a, mipui vantlang hmuha inlan rih lo turin an hrilh nia sawi a ni. Saeed hi dan pawna hnawl, firfiak pawl Lashkar-e-Toiba leh JuD dintu niin, heng pawlte hian India ramah pawikhawihna an thlen fo a ni.