SKorea, Italy, Iran leh Japan dinhmun a ngaihtuahawm : WHO Director-General
World Health Organization (WHO) Director-General Tedros Adhanom Ghebreyesus chuan South Korea, Italy, Iran leh Japan-te chu Covid-19 hri vanga dinhmun ngaihtuahawma an din mek thu a sawi.
Tedros hian he thu hi Geneva-a WHO office-a daily briefing a neihnaah a sawi a ni. China tih lohah chuan South Korea-ah hian Covid-19 hri kai hi an tam ber a, mi 4,200 chuangin an kai tawh bakah, he hri vanga thi hi 22 an awm tawh bawk.
Iran-ah hian he hri vanga thi hi mi 66 an awm tawh a, hri kai hi mi 1,501 an awm tawh tih hriat a ni bawk. Chung zinga mi 291-te chu uluk taka enkawl an nih hnuah damdawi-in aṭanga chhuah tir an ni. Ṭanpui hna thawk turin Iran-ah hian Thawhṭanni khan WHO special team-te chu an kal. China tih lohah chuan Iran-ah hian he hri vanga thi hi an tam ber.
Thawhṭanni thleng khan Italy-ah hian he hri vanga thi hi mi 52 an tling tawh a, hri kai zat hi mi 2,036 an awm tawh bawk. Japan-ah pawh he hri kai hi mi 960 chuang an awm tawh a, heng zinga a tam zawk chu Yokohama-a lawng
chawlhnaa Diamond Princess lawnga chuangte an ni.
US-ah mi paruk thi tawh
Covid-19 hri vangin US-ah mi paruk an thi tawh tih US Health official-te chuan an sawi. US-a thite hi kum lama upa zawk te an ni a, US-ah hian state 10 aṭangin mi 91-in he hri hi an kai tawh tih US Centers for Disease Control (CDC) chuan a tarlang. Thawhṭanni khan he hri kai thar hi US-ah mi 15 an awm belh bawk.
US health official-te chuan hri darh zel tur hi ven thuai a nih theih nan hma an lak mek thu leh, he hri tih damna tur vaccine an buatsaih mek thu an sawi.