China president-in Russia tlawh dawn

China President Xi Jinping chuan June 5 hian Russia a tlawh dawn a, ni thum chhung a cham ang. 

Chinese Foreign Ministry thupuangtu Lu Kang chuan Russia President Vladimir Putin sawmna angin Jingpin hian Russia hi a tlawh dawn tih a sawi a, Russia-a a cham chhung hian St. Petersburg International Economic Forum vawi 23-naah a tel dawn tih a sawi bawk. 

Chinese Vice Foreign Minister Zhang Hanhui chuan ram pahnihten inlaichinna ṭha zawh an neihna tura bulṭanna thar siam a nih dawn thu a sawi. President Xi leh President Putin-te chuan ram pahnihin kum 70 chhunga inkungkaihna an neih tawh chu an thlir let dawn tih sawiin, an inbiaknaah hian hun lokal zel tura an thawh dun dan turte an sawidun dawn tih a sawi bawk a ni.

Zhang chuan tun din­hmunah chuan China leh Russia inkar boruak chu a ṭha hle tih sawiin, ram pahnih inkara politics-a inrin tawnna awm chu a nghet ṭha hle tih a sawi. China leh Russia hian nikum chhung khan US dollar tluklehdingawn 100 hu velah insumdawn tawnna an kalpui tih Zhang chuan a sawi a, kawng hrang hrangah thawhdunna an nei ṭha hle tih a tarlang bawk.

Vice Foreign Minister chuan ram pahnih hruaitute inbiakna tur hi a hlawhltin ngei a beisei thu a sawi lang a ni.