US kaihhruai ṭangrual pawlten IS an beihnaah civil mi 1,300 an that

US kaihhruai ṭangrual pawlte chuan Islamic State (IS) an beihnaah kum 2014 aṭang khan an tum reng vang ni loin civil mi 1,300 an that tih an sawi.

Thuchhuah an siamah IS laka beihpui an thlak tirh, kum nga kalta vel aṭang khan beihpui ṭum 34,502 an thlak tawh tih an sawi a, hetihlai hian UK-a inkulh monitoring group-te chuan hei ai hian civil mi thi hi an tam daih tawh zawk tih sawiin, mi 13,000 vel tal chu an thi tawh tih an sawi ve thung.

Ṭangrual pawlte hian thla riat kalta vel kha chuan civil mi an thah palh hi mi 1,100 vel an ni tih an sawi a, Amnesty International senior crisis response advisor Donatella Rovera erawh chuan US kaihhruai ṭangrual pawlte hian thudik an zep ṭhen tih a sawi thung a ni.

Donatella Rovera chuan thla hmasaa activist-te'n an chhuichiannaah Syria-a Raqqa khuaah ringawt pawh civil mi 1,600 aia tam thah an ni tih a sawi. Hei hi IS laka 2017 kuma thla nga chhung vel leka an thah a ni tih a sawi bawk.