Russia-a Dzerzhinsk-ah factory a puak, mi 79-in hliam an tuar

Russia-a Dzerzhinsk-ah Inrinni khan factory a puak a, mi 79 an hliam bakah factory bula awm chenna-in 180 vel a tichhia.

Dzerzhinsk cityofficial-te chuan factory puak hi puak thei thil siamna leh dahṭhatna hmun a ni tih an sawi a, a factory hi a chhe hneh hle tih an sawi. Factory puak hian JSC Kristall Research Institute plant pawh a tichhe vek tih an sawi.

Factory official-te chuan a puah lai hian factory chhungah mi panga an awm tih an sawi a, mahse him taka hruaichhuah hman an ni tih an sawi a ni. Hliam tam zawk hi factory puak vanga darthlalang thlawkin a tih hliamte an ni hlawm.

City official-te chuan factory puahna chhehvelah hian emergency an puang nghal a, Investigative Committee of Russia chuan factory puah dan chu an chhuizui nghal tih an sawi ve bawk. Tualchhung health ministry chuan hliam 79 zinga 38 hi factory-a hnathawk an ni tih an sawi a, midang 41 erawh hi chu a khaw mi pangai an nih tih an sawi. Hliam tuar zingah naupang an awm lo tih an sawi bawk.