Donald Trump-a'n UK a tlawh
US President Donald Trump chuan nimin khan England-a London Stansted Airport a thleng a, UK-ah hian ni thum chhung a cham ang.
Donald Trump hian England Lal chhungkuate meeting a neihpui dawn a, climate change leh Chinese technology firm Huawei chungchangah Prime Minister kal chhuak tur Theresa May-i pawh meeting a neihpui dawn bawk. Theresa May leh Trump hian vawiin aṭang hian inbiakna an nei ṭan ang.
Hetihlai hian hmun tam takah Donald Trump duh lohna lantir a ni a, London, Manchester, Belfast leh Birmingham khawpuiahte chuan Tump-a'n UK a tlawh duh lohna an lantir a ni. British Prime Minister hian climate change chungchang a sawi rin a ni a, Thawhṭanni pawh khan UK sorkar thupuangtu chuan 2017-a Paris Agreement aṭanga US a inhnuhdawh avanga an lawm loh thu a la sawi a ni.
US-in blacklist-a a dah Huawei chungchang pawh an sawidun ngei rin a ni a, hetihlai hian UK hian Huawei hi 5G network atan an 'non-core' component supply a phalsak dawn nia sawi a awm thung.
Nimin khan Westminster Abbey a tlawh a, Prince Charles leh Duchess of Cornwall Camilla-te chu Clarence House-ah thingpui a inpui bawk a, nimin tlai lamah khan Queen Elizabeth chuan Buckingham Palace-ah president leh US First Lady Melania Trump-i te tan ruaipui a buatsaih sak dawn nia tarlan a ni bawk a, he thu ziah lai hian thuchiang hriat hman a la ni lo. He hunah hian Duke and Duchess of Cambridge Prince William leh Kate Middleton-te pawh tel tura beisei an ni a, Duchess of Sussex Prince Harry leh Meghan Markle-te erawh fapa thar an neih avangin an tel dawn lo thung.
Buckingham Palace-ah hian US President Trump leh Queen Elizabeth-te hian thu an sawi ve ve a ni. President Donald Trump hi US Ambassador chenna Regent's Park, Winfield House-ah a thleng a, venhimna pawh khauh taka kalpui a ni.
Donald Trump leh May-i te hian vawiinah hian St James's Palace-ah sumdawng mite tukṭhuan an eipui dawn bawk a, he hunah hian sumdawng lian eng emaw zat an tel ang. Hemi hnu hian Downing Street tlawhin May-i nen hian inbiakna an neih zawm leh dawn a, inbiakna an neih zawh hian press conference an nei dawn bawk.
Trump hian naktukah Portsmouth a tlawh dawn bawk a, hemi hnu hian Ireland-a tlawh leh dawn a ni. Ireland-ah hian Irish Taoiseach (Prime Minister) Leo Varadka meeting a neihpui dawn a ni.